Hver er eiginlega þessi Hugleikur?
Það er von að þú spyrjir. Vonandi finnur þú vísbendingar hér, en besta leiðin til að kynnast hinu sögufræga og alræmda óviðjafnanlega leikfélagi er auðvitað með því að taka þátt.
Fylgstu með, því spennandi leikár er að fara í hönd!
Úr fyrstu leiksýningu Hugleiks árið 1984, Bónorðsförinni.
Vorið 2025 bauð þetta einvalalið gestum í ógleymanlega heimsókn í Gjaldeyri við Ystu-Nöf í uppfærslu félagsins á hinum sígilda söngleik Góðverkin kalla!
Leikfélagið Hugleikur tók til starfa 1984 og fagnaði 40 ára afmæli í apríl 2024.
Hugleikur er langlífasta og öflugasta starfandi áhugaleikfélag í Reykjavík, en á fjórum áratugum hefur félagið sett upp hátt í 50 leiksýningar í fullri lengd auk rúmlega 200 styttri verka sem ratað hafa á svið.
Eitt af aðalsmerkjum félagsins er að setja upp frumsamin verk eftir Hugleikara – enda hefur félagið getað sótt í hugarheima skapandi höfunda í sínum röðum allt frá stofnun.
Þar áður var líka gríðarlegt fjör!
Hátt í 1000 gestir * komu á fjórar sýningar á nýrri uppfærslu Jólaævintýris Hugleiks í desember 2023 og skemmtu sér næstum jafn vel og leikhópurinn.
* sumir komu oft
Af æfingu á Húsfélaginu eftir höfundahóp Hugleiks – frumsýnt vorið 2023. Bergþóra og Hallgerður heyja söngeinvígi.
Hvernig tek ég þátt í Hugleik?
Það geta öll verið með í Hugleik. Það eru engar kröfur um reynslu eða inntökupróf – bara að hafa áhuga og láta sjá sig, til dæmis á námskeiði eða auglýstum samlestri.
Lifandi leikfélag er miklu meira en hópur leikara á sviði. Leikfélag snýst um ánægjuna af því að vinna í samstarfi við aðra, kveikja hugmyndir hvert hjá öðru og sjá eitthvað nýtt verða til. Það þurfa ekki öll sem taka þátt í leikstarfi að hafa áhuga á leiklistinni sem slíkri, enda fjölmörg önnur hlutverk sem þarf að sinna – allt frá skrifum, leikmynd og búningum til markaðsstarfs og framkvæmdastjórnar.
Sjá nánar um hvernig þú getur tekið þátt.
Æfinga- og félagshúsnæði
Félagið hefur aðsetur að Langholtsvegi 109-111 sem það nýtir til æfinga og félagsstarfs. Gengið er inn í portinu baka til.
Hugleikurum og öðrum stendur til boða að leigja húsnæðið á mjög sanngjörnu verði, til dæmis fyrir námskeið eða aðrar samkomur. Sjá yfirlit yfir bókanir.
Áhugaleikfélag án fastra tekjustofna reiðir sig auðvitað á vinnuframlag félaga sinna og stuðning velgjörðarmanna til að halda skútunni á floti. Unnið er að skráningu Hugleiks sem almannaheillafélags og leikfélagið er þakklátt öllum sem sjá sér fært að styðja við starf félagsins með beinum eða óbeinum hætti.
Þau sem hafa áhuga á að styðja Hugleik eru hvött til að hafa samband við formann (gegnum netfangið hugleikur@hugleikur.is) og ræða mögulegt samstarf.
